Skotong Minister Tikrikilla CHC-ko rikna pangchakani ro•ongko songe on•anga  

Tura, June 11, 2022: A•dokni Skotong Minister Conrad Sangma Sonibar salo West Garo Hills a•jao donggipa Tikrikilla-ni Primary Health Centre (PHC)-ko Community Health Centre (CHC)-ona ra•doatenba, Kentapara songo kamrangko a•bachengna gita pangchakani ro•ongko songe on•angaha.

Ia pangchakani ro•ongko songe on•ani salo Phulbari-ni MLA Esmatur Mominin, Tikrikilla-ni MLA Jimmy D.Sangma, Meghalaya State Planning Board-ni Co-Chairman aro Raksamgre-ni gitcham MLA Limison D.Sangma aro gipin Officer-rangba dongpaha.

“Anga da•alo ia kamko chu•sokatna man•ahani gimin namen kusi ong•a. Anga batanggimin salrango angni ianona re•bamiting somoio PHC-ni obosta namgijako nike namen dukko man•aha, maidakode ia jolni manderang namgipa sanchakram biapo sagiparangko sanne an•seng baljokaniko man•gen. Ia hospital-ko namdapatna anga kamrangko ka•na angni gisik namen cha•suaha, indake da•alo ia hospital-ko rikna kamrang a•bachenganiko nike anga namen kusi ong•a” ine Conrad Sangma aganangaha.