Tura, June 11, 2022: Garo Students’ Union (CEC) HQ Tura-ni President Zikku Balgra N Marak, SSLC aro HSSLC porikkako pass ka•anggipa pilak chatro chatrirangna nama sikaniko on•atna baksana kusi ong•aniko parakataha.
“Anga aro angni ka•rimskarang SSLC aro HSSLC porikkako name pass ka•gipa pilak chatro chatrirangna nama sikaniko on•atna kusi ong•a. Chinga Union-ni gita Education Department-ni manderang aro pilak skulni skigiparangko mittelpilna sika. Mikkangchi nambata result-rangko man•na aro a•dokna mikkim rasongko ra•bana, skul nokrangko namedake taridape on•na nanga aro skigiparang donggijagipa skulrango skigiparangko rakkie on•na nanga” ine Zikku Balgra didiataha.
“Chinga porikka pass ka•giparangnasan ong•aigija, je chatro chatrirangan ia bilsini SSLC aro HSSLC porikkako name seatna man•jahachim, uamangnaba nama sikaniko on•na sika. Pilak mandean ra•onnako man•esa, neng•skime jotton ka•esa chu•sokgipa ong•na man•a. Uni gimin je chatro chatrirangan ia bilsini porikkako chu•sokna man•jahachim, uamang mikkangchi nambate jotton ka•angchina aro poraiako watgalgija gisiko nangbate poraiangchina GSU didiataha.