Dame A•pal songoni Raja A•pal bajarona re•gipa rama namjani gimin jolni manderang suk ong•gijaniko parakata.  

Resubelpara, June 12, 2022:North Garo Hills a•jani Resubelpara elakkao donggipa Dame A•pal songoni Raja A•pal bajarona re·gipa rama namsrangjani gimin songni manderang suk ong·gijaniko parakataha.

Ian Thapa bajaroni Dame A·pal songko nappake Raja A•pal bajarona dakanggipa PWD sorok ong·achim, indiba ia sorokko nirok simsakgija galchipe donani a·sel wachini somoio mikka wae a•dubekrara dake salantio skul re·ruraenggipa chatro chatrirang, bading chiwalgiparang aro dingtang dingtang nanganirangna re·ruraenggipa manderang namen neng·nikaniko man·enga ine u·iataha.

Ia ramako salanti re·ruraenggipa Dame A•pal, Dame Abanda, Gindapasari, Dame A•ga, Gopdi A•sim, Dimbil A•ding, Rangramgre, Bokma A•pal, Chidaret songni manderang re·a doanio mongsonggipa rama dilmong ong·a, una agreba ia ramaan Thapa bajaroni Raja A•pal gita napake Dingokona re·gipa mongsonggipa ramaba ong·achim.

Ia rama namgijani gimin taripile on·china joltangni MLA, TD Shira-na changni chang badi ka•e mol•molaniko dakahachim, indiba knachakgija da·alona kingkingba taripile on·kuja. Uni gimin ia ramako ta•rake taripile on·china bil gnanggipa manderangko jolni manderang mol•molataha.