Shillong, June 19, 2022:A•dokni Skotong Minister Conrad Sangma, Home Minister Lahkmen Rymbui, East Jaintia Hills a•jani Deputy Commissioner, Meghalaya-ni Pulis Official-rang, PWD aro National Highways Authority of India (NHAI)-ni Official-rang baksa re•anggipa antio mikka jimbee waanichi nosto ong•gipa East Jaintia Hills a•jani Lumshnong National Highway (NH)-06 sorokrangko Robibar salo niangaha.
Garirang NH-06 gita re•na man•jae, da•odipet sorokoni dingtang ma•ekanggipa (Diversion Road) sorok Lumshnong Star Cement biap gita re•ruraskaenga ine u•iataha. Nosto ong•gipa NH-06 sorokrangko ta•rake taripilna gita kamrangko a•bacjengatchina aro songre songgabate ramao jachange dongenggiparangna cha•ani aro chirangko chu•ongagita suale on•china Skotong Minister Official-rangko didiangaha.