Tura, June 19, 2022: West Garo Hills a•jani Deputy Commissioner Swapnil Tembe, rama jal•angrang nosto ong•e namjani bidingo manderangna mikkrakataniko on•ataha.
“Mebitpara songni sorokko a•a rudapani a•sel Salmanpara songko napake Purakhasia-oni Ampati-ona re•gipa rama champengatako man•aha. Indake Gambegre-ko napake Tura-oni Purakhasia-ona re•gipa ramaba mikka jimbee waanichi Chenggapara aro Jibalgre songrango nosto ong•ako man•aha. State Highway-12, jean Mahendraganj-ko napake Purakhasia-oni Ampati-ona re•gipa rama ong•achim, ia ramani Darong dollong nosto ong•ani a•sel dal•dalgipa garirangni re•ruraaniko champengataha. NH-51 rama jean Dalu Karonggre-o nosto ong•aha. Uandake Dalu sepang jolo donggipa Kujikura bolni dollong mikka jimbee waani a•sel nosto ong•ako man•aha. Lower Damalgre-ni ramao bol be•dapenba manderang re•a doanio neng•nikaniko man•tokenga. Tura MBOSE sepango 11 KV bijoli lineo bol dal•a be•dapaha” ine DC u•iataha.
Mikka jimbee wamiting somoio nangana agre nokoni ong•katjachina gitaba DC didiataha. A•sel ong•arangko ba obostarangko chagrongna nanggenchimode, 112 toll free nombor-ona call ka•e u•iatna man•gen aro unbaksana Pulis Control Room 8837423053 nombor-ona call ka•e u•iatna gita man•gen ineba u•idapataha.