Baghmara, Nov 10, 2022: Meghalaya a•dokni Skotong Minister Pa Conrad Sangma Monggolbar salo South Garo Hills a·jao donggipa Siju Community & Rural Development (C&RD) Block gitalko songe on·angaha.
Ia gital Siju C&RD Block-ko songe on·angani salo Assembly-ni Deputy Speaker Timothy D Shira, Rongara-Siju-ni MLA Rakkam A Sangma, Rongjeng-ni MLA Jim Sangma, Williamnagar-ni MLA Marcuise N. Marak, Kharkutta-ni MLA Rupert Momin, GHADC-ni CEM Albinush Marak aro gipin dilgiparang dongpae bakko ra·angaha.
Indake ia gitalgipa Siju C&RD Block-ko songe ba do·ga oe on·angani salo a·dokni Skotong Minister, jinmana aganprakengon, Meghalaya a·dokni skanggipa Skotong Minister ong•anggipa aro Meghalaya a·dokko man·na dakgrikdilgipa Captain Williamson A Sangma-ko gisik ra•na gita ia gital Block-ko kuliaha, jedakode Siju aro uni wilwilao donggipa dingtang dingtang songrangna namroro silroroaniko ra·bana man•gen aro bang•a dakchakaniko on•na man•gen, ia miksonganio Siju C&RD block-ko kuliaha ine Conrad Sangma aganangaha.
Meghalaya a·doko gimikni gitan namroro silroroaniko ra·bana MDA sorkari raken kamrangko ka·enga. Meghalaya a·doko songdongenggipa manderangni janggi tangani gadangko dingtangatna sorkari, dingtangmancha ramram manderangna dingtang dingtang program-rangko a·bachengate on·aha ineba Pa Sangma aganaha.
“Ia Siju-Rongara jolrangara Meghalaya a·dokni Ma•ambio namen mingsinggipa aro gamchatgipa biap ong·a, maina ian Tribal manderangni bilko chel·chakna rakbee warachakdilgipa a·dokni skanggipa Skotong Minister Captain Williamson A.Sangma-ni atchiram songba ong·a,” ineba Skotong Minister aganangaha.
Meghalaya a·dokni bilsi 50-na re·mikkanganio bang·a dilgiparang a·dokni namroro silroroanina on·giltokaha, indiba bang•a dingtang dingtang kamrangon Meghalaya a·dok ja·manchakengkua. Indake ong•genchimoba, MDA sorkari a·dokko tang•dodapatna nisanrangko donne kamrangko ka·enga ineba parakangaha.
“Mikkang bilsi 50-ni gisepo chingni nangnika gita Meghalaya a·dokko ong•atna niksamsoe aro chanchisoe kamrangko ka·na nangenga,” ine Pa Sangma agandapangaha.
Skotong Minister gital Siju C&RD Block-ko songe on•ani salo Atongrang Chugan-o chrokaniko mesokangan baksa dingtang dingtang dolrang gitrangko ring·e tom•bagipa manderangko an•saoatangaha.