BJP Meghalaya Joining Program-ko Tura-o ong•atanga, NPP-ni MDC BJP-o napea
Tura, Nov 10, 2022: Meghalaya BJP Butbar salo Joining program-ko Tura Orchid Lodge-o ong•atangaha. Ia program-ko ong•atanio bang•a BJP dilgiparang re•bae BJP dolo napegipa manderangko kusi ong•e rimchaksoaha.
Indake ia joining program-o Naguapara-ni NPP MDC, Pa Dhormonath Sangma BJP dolo napangaha. Unbaksa gipin sakgni chadamberang re•baenggipa 2023 bilsio MLA susana miksonge BJP dolo napangtokaha. Una agreba Mahendraganj elakkani Congress Secretary baksa dingtang dingtang elakkani me•apa, me•chikmarang aro chadamberang BJP dolo napetokaha.
Ia tom•anio BJP-ni National Vice President aro Meghalaya in-charge Dr M.Chuba Ao, National Secretary Rithuraj Sinha, Meghalaya a•dokni BJP President Earnest Mawrie, Assam a•dokni BJP Spoke Person Rupam Goshami, dingtangtang district-ni BJP dilgiparang, Mahila dilgiparang, Morcha-ni dilgiparang dongpae bakko ra•angtokaha.
National Secretary Rithuraj Sinha, jinmana aganprakengon, Garo Hills-ni bang•a manderang BJP dolo napeaniko nike namen kusi ong•aniko parakangaha. BJP-ara India a•songo dal•batgipa ge•sa party ong•a. BJP-ni miksongara India a•songo songdongenggipa manderangni dol ong•a. Da•alo Narendra Modi-ni dilanichi, India a•songni kona noksikrango bang•a development-rangko sokatah. BJP dol jat basegijagipa, torom basegijagipa, kangal cha•sigipa manderangko sandie janggi tangani cholko on•gipa political party ong•a. Prime Minister Narendra Modi a•songni manderangna ka•sagipa, a•songko namroro silroroatna rake kamko ka•gipa ong•a. BJP party maming saloba a•songo corruption-ko ra•bagijagipa aro family politics ong•gijagipa India a•songni political party ong•a. Uni gimin na•simang Garo Hills-o BJP-ko bilakatbo aro re•baenggipa 2023 bilsini eleksino BJP candidate-rangko cheatbo. Jedakode, Meghalaya a•doko BJP sorkari rike namroro silroroaniko ra•bana man•gen ine ua aganangaha.
Dhormonath Sangma an•tangni BJP dolo napani miksongako aganengon, “Anga NPP-ni MDC ong•achim, indiba batanggimin salrango GHADC-ni EC gitcham be•gruani ja•man, NPP dolni dilgiparang angko neglect ka•ani gimin, anga gisiko suk ong•ja. Indake anga NPP dolo donge kamko ka•angkua ong•ode an•tangni areana aro manderangna maming namgniko ra•bana man•jawa, uni giminisa areatangni manderangna chanchie, mikkangchi nama development-rangko ra•bana da•alo anga BJP dolo napaha. Maina BJP dolna agre darang party-ba development-ko ra•bana man•jawa. An•ching salgro salaram a•dokrango aro Ma•mongoba BJP-sa sorkariko rikenga, gipin party-de development-ko on•na man•chongmotjawa ine anga ma•siaha. Unbaksana anga mikkang bilsio MLA susana gitaba an•tangko tarisoenga. Da•alo anga angni manderang sak 3000 baksa apsan ku•monge, BJP dolo napaha” ine Dhormonath Sangma aganaha.
Indake ong•engon, da•odipet BJP dolni candidate-rangko ma•mongoni u•iatkuja, indiba anga Garo Hills-ni manderang jemangan BJP party-na kang•kare kae, dolko bilakatna kamko ka•enga aro MLA susana party tikitko bi•engachim, listrangko tarie watatgen aro ru•utgijan party-ni candidate-rangko parakatgen. “Da•alo Garo Hills-ni manderang gisiko nangbee chel•begipa biaprangoni re•bae, tom•anio bakko ra•eahani gimin anga namen kusi ong•a. Mikkangchi Garo Hills-o BJP dolko bilakatna rakbate kamrangko ka•e, BJP candidate-rangko che•atna man•chongmotgen ine anga ka•donga” ine BJP-ni National Vice President aro Meghalaya in-charge Dr Chuba Ao aganangskaha.