Chang 46-gipa dama bol 100-ko doke wangalaniko a•bachengata 

0

Tura, Nov 10, 2022: Bilsianti manirongnaenga gita ia bilsioba chang 46-gipa Dama Bol 100-ko doke Wangalani ba 100 Drums Wangala Festival-ko November 10 tarik Bristibar salo Tura-oni km 15 mang chel•o donggipa Chibragre Wangala A•damo a•bachengataha.

Ia Dama Bol 100-ko doke Wangalani skanggipa salo Handloom aro Handicraft Exhibition-ko a•bachengate on•angaha. Indake apsan salni attamchibara dingtang dingtang A•chik jat kal•susaanirangko ong•atangjolaha.

Ia Dama Bol 100-ko doke wangalaniko a•bachengatani salo GHADC-ni CEM Albinush R.Marak mongsonggipa sokgipa ong•e bakko ra•angaha aro unbaksa dongpagipa GHADC-ni gipin Executive Membor-ranga Linekar K.Sangma, Nathawal S.Marak, GHADC-ni Joint Secretary Peter R.Marak, Nagaland Garo Tribal Council GSU Nagaland Zone-ni dilgiparang, of Nokma-ni dilgiparang, Nokma Council-ni dilgiparang, Hundred Drums Wangala Festival Committee (HDWFC)-ni dilgiparang dongpae bakko ra•angaha.

Indake ia skanggipa Wangalani salo Tura Govt Colege aro Tura NEHU Campus-o poraienggipa chatro chatrirang Wangalan baksa a•songna ring•mittele mesokangaha.

Una agreba District Sports Office, Tura A•chik jatni kal•susaanirangko ong•atangaha, uaranga An•ding Oka, Wa•pong Sika, Jakpong Pe•a, Rongma Chilsusaa aro Budu Salsusagrika (Tug of War)-ko kal•susae mesokangaha.

Indake ia Dama Bol 100-ko doke Wangalani salo GHADC-ni CEM, jinmana aganprakengon, ia chang 46-gipa 100 Drums Wangalaniko ong•atna rakbee kamrangko ka•ahani gimin HDWFC-ni membor-rangko mittele aganangaha. Ia A•chik ma•gitcham pagitchamrangni a•bachengate donanggipa A•chik jatni dal•batgipa aro gamchatgipa dakbewal rikbewalrangko mikkangchi gimaatgija name rakkiangkuchina didiangaha. Ia manianiko HDWFC-san ong•aigija A•chik jat sakantian name ripingangna nanga ineba aganangaha.

Ia Wangalaniko ong•ataniara, bilsigimiko game ge•e man•gipa a•bani bosturang jekai mi-misi, ta•ma-ta•ring aro uandake dingtang dingtang a•bani bosturangko akman-tetmano, bilsini bon•angachibara October aro November jani gisepo chengonin A•chik ma•gitcham pagitchamrang, Pattigipa Ra•rongipa (Great Giver) mite Misi-Saljongko mittele manianiko dakronga. Ia Wagangalaniko A•chik songrangode, Nokma-ni sa•raosa Wangalronga, indiba da•alo ia jatni dakbewalko ripingna dama bol richasako doke, Wangalaniko dakmesoke ripinganiara jatni dal•batgipa kam ong•a, ineba CEM aganangaha.

Indake ia Dama Bol 100-ko doke Wangalani skanggipa salo HDWFC-ni Chairman Ronald Rikman Sangma rimchaksoani kattarangko aganengon, Chibragre Wangala A•damo re•anggipa 2020 bilsidipetsa a•bachengatna man•aha aro sokbagipa manderangna chu•onga gita dongchak roanirangko on•na man•kuja. “Chinga ia Wangala A•dam-o, Garo Harritage Village”-ko donne, jatni pilak dakbewal rikbewalrangko daksninge ripingenga” ine Rikman Sangma aganangaha. Mikkangchi ia biapko nambate taridapangkuna nangenga ineba aganangaha.

Ia skanggipa salni 100 Drums Wangala Festivalo kal•susae chegiparangna HDWFC-ni Chairman Ronald Rikman Ch.Sangma boksisrangko suale on•angaha.

Leave A Reply

Your email address will not be published.