Skotong Minister CTE-ni building aro chatro chatrirangni hostel-rangko nokdonggae on•anga 

0

Tura, Aug 20, 2022: Meghalaya a•dokni Skotong Minister Conrad Sangma August 19 tarik Sukrobar salo Tura Rongkhon-o donggipa College of Teachers Education (CTE)-ni gital building nokko aro me•a aro me•chik chatro chatrirangni dongchakna rikgipa hostel-ko nokdonggae on•angaha.

Ia gital nokrangko nokdonggae on•angani somoio North Tura-ni MLA aro Skotong Minister-ni Adviser Thomas A.Sangma-ba dongpae bakko ra•angaha.

College of Teachers Education (CTE)-ni gital building nok aro hostel-rangko rikna gita a•dok sorkarini ra•gatgipa, Supporting Human Capital Development (SHCD), Meghalaya -na tangka gong kror 18.04-ko Asian Development Bank (ADB) dakchake on•ataha.

Tura Rongkhon-o donggipa CTE-ko 1993 bilsio kuliaha aro ia college-o skigipani kamko ka•na skigipa bang•a manderang B.Ed Degree-rangko dake, dingtang dingtang skul aro kolege-rango skigipani kamko ka•na cholko man•tokenga.

CTE-ni gital building nok aro chatro chatrirangni hostelrangko nokdonggae on•angani somoio a•dokni Skotong Minister, Conrad Sangma jinmana aganprakangengon, re•anggipa 2018 bilsio a•dok sorkariko jako ra•chengon, MDA sorkari lekka poraniko mongsongbatgipa donne, a•doko lekka porani gadangko nambatatna bang•bea tangka paisarangko chamaha ine parakangaha.

MDA sorkariko rikchengani somoio a•doko lekka porani gadangko namdapatna maming cholrang dongjachim. Uni gimin lekka porani gadangko namdapatna ra•bianirangko aro neng•nikanirangko sandie MDA sorkari lekka poraniko tang•doatna cholrangko sandie kam ka•aha ine skotong minister aganangaha.

Uni agananga gitade, lekka porani gadangko ta•rake namdapatna man•jawa ine aganangenba dingtang dingtang dolrang, chatro chatrirang, skigiparang aro jatko dilenggiparang apsan ku•monge kam ka•anichisa dingtanganiko ra•bana man•gen ine Conrad Sangma aganangaha.

CTE-ni gital building nokko rikna tangka gong kror 18-ko chamaniara sorkarina dal•bea ra•biani ong•a. A•doko lekka porani gadangko tang•doatna sorkarini kang•kare kae kam ka•anichi ia gital building nok aro hostelrangko matchotatna man•aha ine skotong minister jinmana parakangaha.

Leave A Reply

Your email address will not be published.