GSU EZ-ni Vice President a•gilsakko watanganina GSU-CEC kalimpaaniko parakata 

Tura, Aug 20, 2022:Garo Students’ Union (GSU) Eastern Zone-ni Vice President Silbil N.Marak, August 19 tarik Sukrobar salo an•tangni ka•sagipa ma•a paa, ma•drang maharirang aro pilak ka•rimska ripengrangko wate jringjrotna neng•takram biapona re•anganina GSU-CEC, HQ Tura-ni Assistant General Secretary Salman D.Sangma nokdangni manderangna duk ong•rimpaaniko parakataha.

Uni a•gilsakko wate re•anganichi A•chik jat aro a•songna dal•bea gimaani aro aiao inmangipa dukni ong•aha.

“Silbil N.Marak tangmittingo A•chik a•songna aro jatna gisiko nangbee dangdike on•anganiko chinga pangnan gualjawa. Uni A•chik a•songna dangdike on•anganiko GSU maming dakeba gualna man•jawa. Uni ma•a paa aro nokdangni manderangna GSU-CEC, duk ong•e kalimpaaniko parakatenga. Ua a•gilsako dongjahaoba uni janggi jringjrotna tom•tome neng•takchina aro nokdangni manderangna Nokgipa Isol ka•dimeaniko on•china, angni sika aro bi•a” ine Salman D. Sangma duk ong•rimpaaniko parakataha.