Tura, Aug 20, 2022: Phulbari, Rajabala aro Chibinang jolni nangrimgimin NGO-rang Skurbar salo re•anggipa March jaonin bijoli wata tik ong•jaengani gimin MePDCL Phulbari Sub Station-ona re·ange sing•sandianiko dakenba Dadenggre Civil Sub-Divisional Officer-na lekka sedoangaha.
NGO dilgiparangni MePDCL Phulbari Sub Station-ona re•angon, darang official aro chokidar-koba ua biapo nikena man·jahani gimin suk ong•gijaniko parakataha.
“Ia Electricity Department manderangoniko indin cha·boke indita jarangna bijoliko tik ong·e wata gri cha·bokengani gimin mikkangchi chinga Nokma-rangko okgame rakbata ja·kurangko de•angna chanchianiko daken” ine GSU Phulbari Regional Unit-ni President Pangsrang A.Sangma seachi parakataha.
“Mikkangchi indake dakangkua ong•ode, MePDCL Phulbari Sub Station-ni Junior Engineer-ko aro uano kam ka•enggipa manderangko chu·gimik kamoni ra·galchina chinga raken dabianggen” ineba mikkrakataniko on•ataha.
Batanggimin salrango MePDCL department A•kawe jolo songdongenggipa manderangna bijoliko tik ong·e watjaenga aro watgenchimoba voltage donggijako watani a•sel ching•a, kimita dakengani gimin manderang namen neng•nikaniko man•enga. Uni gimin nangrimrimin NGO-rang MePDCL Phulbari Sub-Station-ni Selsela Gongglangre (Garobadha) Electricity Office-ona re•ange sing·sandianiko dakna ku·monganiko dakangaha ine GSMC Rengmagre Unit aro FKJGP Rajabala Circle-ni dilgiparang u•iataha.
“MePDCL department songsalna indake namgijako dakangkuode ba ra•bataigenchim ong•ode, uamangni kosako NGO-rang apsan ku•monge rakbegipa ja·kurangko de•anggen” ine GSU Phulbari Regional Unit-ni Environment Secretary Arcosh M.Momin parakataha.