Shillong, June 18, 2022:Adita salrangna Meghalaya a•doko mikkarang jimbee waani a•sel Meghalaya a•dokni dingtang dingtang a•jarango mikka chima dal•e, bang•a nok jamrangko a•arang be•grudape manderangni janggirangko gimaataha. Indake ong•engon, South Garo Hills a•jani Baghmara Bolsalgre-o nokdang ge•sani sakgittam manderang aro Siju-o saksa janggitangko gimaataha.
Indake Sukrobar pringo mikka chima dal•ani a•sel South Garo Hills-o sak 4 manderangni janggirang gimaanina a•dokni Skotong Minister Conrad K.Sangma, sianggipa manderangna kalimpaaniko parakataha.
Rang•gitik a•arang be•dapanio sianggipa manderangni janggirang tom•tomao neng•takchina uni nama sikaniko parakatan baksa sianggipa manderang sakprakna tangka gong lak 4-ko a•dok sorkari ka•sae on•pilskagen ineba Skotong Minister parakataha.