Chi bananichi duko ga•akenggiparangna dakchakaniko on•china GSMC, DC-ko didiata
Tura, June 18, 2022:West Garo Hills a•jani Raksamgre Civil Sub Division-ni ning•o donggipa Pedaldoba jolrango mikka jimbee waanichi chi bana re•e nok jamrang chi sripani a•sel neng•nikaniko man•enggipa songrangna dakchakanirangko on•china Garoland State Movement Committee (GSMC) Pedaldoba Regional Unit, West Garo Hills a•jani Deputy Commissioner-ko didiataha.
GSMC Pedaldoba Regional Unit-ni Chairman, Rimjen Ch. Sangma-ni parakatani gitade, Pedaldoba jolrango chi bananichi rama jal•angrang, bijoli krongrang, mi a•palrang bang•en nosto ong•atako man•aha, indiba da•alonaba department-ni Official-rang re•ange niea dongkuja.
Pedaldoba jolrango ram jal•angrang, bijoli krongrang, nok jamrang aro sorokrangsan ong•aigija, manderangni ge•a gamanirang, jilla kaanirang aro gam jinrangko gimaatna nange songni manderang duk mikchirangko chakna nangtokenga. Indiba da•onan department-ni manderang re•ange nirok sandiea dongkuja ine Rimjen Sangma parakataha.
Pedaldoba-oni Rongsai-ona dakanggipa NEC sorok Rongsai bajar sambao be•wakaha, indiba ia rama nosto ong•aniko nikengoba Raksamgre-ni MLA Benedict Marak aro gipin dilgiparang mikkangtangtangko dongnue chaktokenga ine Rimjen Sangma matnangataha.
Uni gimin, duko ga•akenggipa manderangna pilak nanganirang, cha•a ringanirangko sokate on•china West Garo Hills-ni DC-ko GSMC dilgipa mol•molataha.