Mallangkona, April 5, 2022: Sombar salo Mallangkona jolo songdongenggipa pilak A•chik songrangni manderang Mallang Siminaguri songo tom•aniko ong•ate chanchirimaniko dakangaha ine u•iataha.
Re•anggipa March 29 tariko Assam aro Meghalaya a•dok ge•gnini Skotong Minister-rang Memorandum of Understanding (MoU)-ko soi ka•grikanio, Meghalaya a•doko donggipa A•chik songrangko Assam-chi chapatahani gimin tom•aniko ong•atangaha. Mallangkona jolo songdongenggipa A•chik songrang jekai Mallang Joypur, Mallang-Salbari, Mallang-Huhuapara, 1973 bilsirangonin Meghalaya a•doko donge eleksin identity card-rangko man•ne eleksin-rango vote pu•onbaengachim aro unbaksana Meghalaya a•doko kamrangko ka•e sorkarini scheme-rangkoba man•enga.Uni gimin a•dok ge•gnini dongimin niam gitade ia songrang Meghalaya a•dok baksa ong•na nanga. Indiba ia A•chik songrangko Assam-chi watatahani gimin Meghalaya a•dokni Skotong Minister Conrad Sangma-ni kamko Mallangkona jolni manderang raken jegalangaha aro MoU-o soi ka•giminko nipiltaichina dabiangaha.
Indake ia tom•anio Nonglang Sirdar re•bae bakko ra•eaha aro ia songrangko Meghalaya baksa chapatpilna KHADC baksa raken kamko ka•angkugen ine ua aganangaha.