Tura, April 5, 2022:Ronjit Sangma-ni Gondeng-ko a•kangani gimin Gondenggre Nokma-ni su•gipa Ma Rettina Marak talataniko on•atskaha.
Ma Rettina Marak-ni talatani gitade, Ronjit Sangma aro Ma Benji Marak skango Britist-rangni somoionin Gondeng-ni nokadamo ba ma•kringo dongbaenga ine tol•enba songbadrango tol•e seataniko jegalatskaha. Ma Benji Marak aro Ronjit Sangma Gondeng-ni nokadamo dongbaenga ine agananiara namen tol•gipa kattasan ong•aia. Maina uamango Gondeng-ni maming chin aro Britist-rangni chasongo on•anggipa bosturangko Benji aro Ronjit-oniko man•jawa. Uamango mamingba chin aro sakki dongja, unbaksana uamang Gondeng-ni nokadamo dongrikgipa aro Nokma gate ra•gipa chingasa Nokma ine tol•e a•kanganiara mikboke agananisan ong•aia. Indiba Nokmani nokadamo dongrikgipa ma•kringko sandibagenchimode, chasongsani ja•mano chasongsa dake Nokma gatrikrikbaniko sandiode, chingni Nokma ma•ambian bakrobata aro chasongba ro•bata, da•o chasong 16 ong•pilengaha ineba talatangaha.
Uni gisepon da•alo uamang Gondeng-ko a•kangenga aro Gondeng-ni ma•kringoni ong•a ine an•tangtangko tol•e sakki on•enga. Uandakgipa tol•ani uamango mamingba sakki aro chin dongja, na•simang re•bae sandina gita man•gen. Gondeng-ni nokadamni gimin aganatengon, Gondeng-ni nokadamo Wakar Saheb-rangna skang Britist-rangni on•anggipa silai manggot aro gnigipa mande sko sotgipa Milam, uarang gimikan chingo donga aro una agreba Britist-ni somoio tarie on•anggipa map gimikan district council-o donga nina gita man•gen.Ronjit Sangma aro Benji Marak indakeba matnangenga, chingo donggipa lekkarang edit ka•giparangsa ine tol•e aganenga. Indiba chingasa edit ka•na man•gen, indiba district council-o donggipako chinga maming dakeba edit ka•na man•jawa, ukoba re•ange sandina gita man•gen.Uni gisepon Ronjit aro Benji, Gondeng-ko a•kange A•chik-ku•chi segipa songbad kingsao aro social mediarango gatatahani gimin chingaba aganchakaniko on•atskaha. Indiba chingni aganchakatgipa kattarangkode ua songbad-o chappa ka•atjaha. Maina Gondeng-ni nokadamko man•rikgipa ong•jani gimin, uamangni tol•e seatgipa kattarang kakket ong•ja. Uni gimin songbad-o aro social mediarango seatpachina chinga record-ko on•ataha, indiba chingni seatgipa record-de, A•chik-ku•chi seatgipa sangbad-o da•onaba nakatbajaha. Uni gimin Ronjit Sangma-ni dol songbad segiparangna maikoba dakna nanga, uni giminsa chingni seatgipa kattarangko songbad-o seatjaha ine Rettina Marak suk ong•gijaniko parakataha.
Songbad segiparang dolsana chake aro mikkang nitee kam ka•na man•aiama, Ronjit Sangma-ni seatakosa gatataia, chingni aganchakatakode gatatjaha. Uni gimin songbad segiparang aro social mediarang dolsana chakesa seaiama ineba Rettina Marak sing•doangaha. Indake ong•engon, chingni pilak kamrang ong•a aro ong•ja, uarangko re•bae sandipachina sakantikon mol•molata. Chengo atchu ambini somoio gimaatgimin a•arangko dakseke ra•giminrangko chinga dakgrike man•pilaha, ua man•pilgimin lekkarang gimikan chingo donga aro area ge•snini Nokmarang sakki on•grimgiparang gimikan donga, iarang edit ong•ja, original-an ong•a, uni gimin Ronjit Sangma Benji Marak aro Michael Marak-ni dolna tol•e sakki on•gipa manderangna Rettina Marak talataniko on•atskaha.