Silki Christian gittimo JJM scheme-ni chi pipe linerangko kam motchotgija donchipenga 

Baghmara, June 11, 2022: South Garo Hills a•jani Chokpot Civil Sub Division-ni ning•o donggipa Silki Christian Gittimo JJM Scheme-ni mongsonggipa chi pipe Line Solar Pumping Machine aro Pump Ringwel-ko man•gipa contractor kam tik ong•e ka•gija galchipe dongenga ine songni manderang u•iataha.

Manderangni koborna u•iatani gitade, Silki Christian Gittimo JJM scheme-ni main Solar Pumping Machine aro Pump Ringwel-ko sub- contractor man•gipa John Cary R Momin da•onaba ia kamko matchote ka•gija donchipengani a•sel gipin contractor-rang jerangnan construction aro house hold Distribution-rangko man•ahachim, uamang tank-o chi dongjaoba somoiko rikna nangpani gimin chi piperangko teke on•engaha.

Indiba Silkigre-o da•onaba mongsonggipa chiko contractor sokatna man•jaenga. Ia Silki Christian gittimna on•gipa JJM scheme-ko 2021 bilsion sanction ong•ahachim. Uni gimin PHE Department-ni Authority-rang ba Official-rang manderangni neng•nikaniko ta•rake nirokatpachina aro on•gimin kamko ta•rake chu•sokatpachina Tenangbath Sangma mikrakataniko on•ataha.