Tura, June 11, 2022: All India Trinamool Congress (AITC) Sonibar salo West Garo Hills a•jani Gambegre elakkao Block Youth Trinamool Congress (BYTMC)-ko songaha.
Ia tom•anio AITC-ni dilgiparang, MDC-rang jekai Rongrong-ni MDC Rinaldo K.Sangma, Dengnakpara MDC Ma Sadhiarani Sangma, Balachanda MDC Agassi R.Marak, Amongpara MDC Nehru Sangma, Betasing MDC Sanjai Koch aro West Garo Hills a•jani TMC Convenor Richard M.Marak dongpae bakko ra•angaha.
“Da•o bang•a manderang a•dok sorkarini ong•gija kamrangko nike Meghalaya a•doko dingtanganiko ra•bana rake kamko ka•enggipa Dr Mukul Sangma-ni dilenggipa TMC dolo bang•bea manderang bakrime kamrangko ka•enga. Uni gimin Meghalaya a•doko TMC-ko bilakatna sakantinian bakrime kamrangko ka•na nangenga” ine Rinaldo Sangma tom•anio aganangaha.
Una agreba Dengnakpara-ni MDC Sadhiarani Sangma-ba tom•anio dongpae, bang•a Gambegre jolo songsongenggipa chadamberang aro me•chikma me•aparang apsan ku•monge TMC-o bakrime kamrangko ka•enga. Unbalsana jolni manderang mikkangchi Dr Mukul Sangma-ko Skotong Minister ong•atpilna rake kamrangko ka•enga ine aganangskaha.
Tom•aniona Gambegre jolni bang•a chadamberang, me•chikma me•aparangba re•bae bakko ra•angaha. Indake tom•anio Richard Marak, Dr Mukul Sangma, maini gimin TMC-o napahachim, manderangna agantalate on•angaha.
“A•doko bang•a corruption-rang ong•a baksana bang•a neng•nikanirangko chagrongenga, ia obostarangko pilakan ma•sia. Uni gimin Meghalaya a•dokko namdapatna aro namroro silroroaniko ra•bana miksonge, grassroot leveloni TMC-ko bilakatna aro re•baenggipa eleksino TMC candidaterangko cheatna rake kamrangko ka•enga. Uni gimin Gambegre jolo songdongenggipa chadamberang aro songni nokni manderang mikkangchi mikkrake aro simsake kamrangko ka•angchina” Richard Marak didiangaha.
Indake ia tom•anio Polbin D.Sangma-ko TMC Youth Wing-ni gital President-na seokangjolaha. Gital seokako man•gipa TMC Youth Wing-ni President Polbin Sangma-ni kobor ra•timgiparangna aganani gitade, manderangchi seokako man•ahani gimin, mikkangchi je kamrangko ka•genchimoba songni nokni manderang baksa ku•monge, songsalna areana aro party-na kamrangko ka•anggen. Una agreba re•baenggipa 2023 bilsini Assembly eleksino TMC chegen ine ka•dongsoaniko parakataha.