Skotong Minister a•a be•dape saknaako man•ne hospitalo sanenggipa mandeko grongea    

Tura, June 11, 2022: Meghalaya a•dokni Skotong Minister Conrad Sangma Sonibar salo Garo Hills a•ja gimiko chi bana re•ani bidingo West Garo Hills a•jani District Administration baksa nipiltaianiko dakani ja•mano June 9 tarikni pringchibara mikka wae Jebalgre songo rang•gittik nokdang ge•sako a•a be•dape saknaa man•gipa Sengrik D.Sangma aro uni depante-ko sanenggipa Tura Civil Hospital-ona re•ange grongeaha.

West Garo Hills a•jani Jebalgre songo Sengrik D.Sangma-ni nokdangko rang•gittik a•a be•dape a•sel ong•anio sianggipa ma•ningsa sakgittamna Skotong Minister Conrad Sangma duk ong•e kalimpaaniko parakangaha.

Conrad Sangma a•sel ong•e sianggipa nokdangni manderangna ka•sae tangka gong lak 12-ko tangrikenggipa nokdangni pagipa Sengrik D.Sangma-ni jako on•angjolaha.