Baghmara, June 17, 2022: Adita salrangna mikka dondikgija jimbee waani a•sel South Garo Hills a•jani skotong songjinma Baghmara Bolsalgre-o Sukrobar pringni 3 bajimango nokdang ge•sako a•a rurongdape nokdangni pagipa, ma•gipa aro depante janggitangko gimaataha.
Apsandaken Siju-o a•a rudape me•chikma saksa anggitangko gimaataha ine koborko man•soaha.
Koborko man•soani gitade, South Garo Hills a•jani Bolsalgre-o nok para ra•e dongenggipa nokdang ge•sako a•a ru•dape nokdang ge•sani sakgittam manderang janggitangko gimaataha. Sianggipa nokdangni manderanga bilsi 26 ong•gipa Tengkam A. Sangma pagipa, bilsi 21 ong•gipa Gamchi Ch. Sangma ma•gipa aro bilsi 4 ong•gipa depante ong•achim.
Ia a•sel ong•aniko kobor man•soe a•dokni Skotong Minister Conrad Sangma sianggipa manderangna kalimpaaniko parakatenba, sianggipa sakprakna tangka gong lak 4-ko tangrikenggipa nokdangni manderangna on•gen ine parakataha. Apsandake, Siju-ni me•chikma saksaba mikka jimbee waanichi a•a rudapako man•ne janggitangko gimaataha.
Re•anggipa antigimik Sukrobar pringona kingking dondikgija mikka jimbee waanichi South Garo Hills a•jani bang•a biaprangon, bajar antirangko, dokkanrangko aro nok jamrangko chi mriptokaha aro a•arang be•rurue rama sorokrangko nosto ong•tokenba re•a doanirangko jachangataha.
NH-62 sorok jean Nongalbibra gita Dudnoi-ona dakanggipa sorok dilmong ong•achim, ua sorokrang mikka jimbee waani a•sel bang•en nosto ong•tokaha.
Uandake Baghmara-ona re•gipa Karukol, Rong•dik dollongrang aro Baghmara Moheskola re•gipa dollongrangko chi man•pakangtokaha ineba u•iataha. Indake Baghmara songjinmaona re•gipa ramarang a•a be•dape, dollongrangko chi man•pakange rama re•na man•gija champengatako man•aha.