Mikka jimbee waanichi ramarang nosto ong•e jolni manderang neng•nikaniko man•enga 

Tura, June 17, 2022: West Garo Hills a•jani Gambegre block-ni ning•o donggipa Chenggapara aro Jebalgre song jatchi A•dugre-oni Tura-ona salanti re•ruraenggipa mongsonggipa sorok mikka waani gimin namen nosto ong•aha aro garirang re•na man•gija champengatako man•aha ine Garoland State Movement Committee (GSMC) HQ, Tura-oni u•iataha.

GSMC, HQ, Tura-ni Additional General Secretary Bostone M.Sangma-ni u•iatani gitade, bang•a PWD sorokrang antigimik mikka dondikgija waanichi bang•en nosto ong•aha.

Indake rama sorokrang nosto ong•e be•ruruaniko PWD department ta•rake nirokatpachina GSMC-ni dilgipa mol•molataha.

Mikka wae rama sorokrang nosto ong•ani a•sel cha•ani ringani bosturangko ra•bana man•jaenga ine u•iataha. Unbaksana an•tangtangni nangarangko koros ka•na bajar anti re•na man•jae songni manderang namen neng•nikaniko man•tokenga ineba u•iataha.

Mongsongbate salantio re•ruraenggipa skul chatro chatrirang jadokni porikkako sena gita Purakasia jolona re•ruraenggipa dilsa mongsonggipa rama ong•achim. Uni gimin songdongenggipa manderangni aro chatro chatrirangni namgnina PWD department ta•rake nosto ong•gipa ramarangko taripile on•china gitaba GSMC mol•molataha.