SGH gipin a•jarangna bate gimikni gitan ja•man chakbatsranggipa a•ja ong•a: GSU
Baghmara, April 26, 2022: South Garo Hills a•jani ning·o donggipa dingtang dingtang PMGSY ramarangko tarina ma•mong sorkarini chamatgimin Scheme-rangko matchote aro name kam ka·jani gimin GSU Karukol Regional Unit-ni President A Z Matsram N. Marak suk ong·gijaniko parakataha.
Matsram Marak-ni parakatani gitade, Karukol A•dinggre-oni Alokpang Songmong-ona, Nengkong-oni Upper Dosogre-ona, Karukol, Nengkong, Emangre aro Tolegre, Bul A•kawe-oni Rewak Kambepal PMGSY ramarangko tarigipa mittamrang chu•sokaha, mittamrang chu•sokkuja aro je matchotgimin sorokrang bilsisa ong•gijan nosto ong·tokaha. Uni gimin indakgipa kamrangko GSU raken jegalataha. Ua PMGSY ramarangni bidingo GSU changni chang badi ka•anirangko dakahachim, indiba District Administration aro bil gnanggipa officer-rang knachakgija aro namrenge dongaia ine u·iataha.
India a·song gimiko namroro silroroanirangko tosusaatgenchimode, Meghalaya a•dokni gisepo South Garo Hills a•jaan gipin a•jarangna bate re•a doani rama jal•angrang namen ja·man chakbatsranggipa a•ja ong•a. Indake ong·engon, ia namjabatsranggipa South Garo Hills a•jani ramarangko tarina chamatgimin PMGSY scheme-rangko name chu·sokatpachina aro kamrangko matchote ka•e on•pachina a•dok sorkariko aro a•jako nirokenggipa bil gnanggipa officer-rangko GSU mol•molataha