Tura, April 26, 2022: West Garo Hills a•jani ning•o donggipa aro Dadenggre elakkao ga•akgipa Jengjal Debilbanggre Non Govt. LP Skul nok namsrangjani gimin monggolbar salo songni manderang wa•jakchi nokking pintokaha; songni manderang koborna u•iataha.
Ian skanggipa Skul Nokko wa•jakchi pinchenggipa ong•genkon. Koborna u•iatani gitade ua skul nokko bilsi gittamna skangan mikka balwa rakani somoio man•pakange nosto ong•ahachim. Indaken poraienggipa bi•sarang skul nok namjani a•sel namen neng•nikaniko man•enga ineba u•iataha.
Ia obostani bidingo songni manderang changni chang bil gnanggipa authority-rangna u•iatahachim. Indiba authority-rang iani bidingo mamingkon knachakjaha aro da•alona kingking maming ja•ku de•aniko dakkuja ine songni manderang suk ong•gijaniko parakataha.
Indake authority-rangni nirok simsakgija galchipani a•sel songni manderang bi•sarangni poraianiko bon•chipatjana gisiko nangbee, jinma apsan ku•mongenba wa•jakchi nokking pinsrangaha. Uni gimin, uandakgipa skul nokrangko bi•sarangni namgnina chanchie authority-rang ta•rake nirok simsakatpachina gitaba songni manderang mol•molataha