Serimina Marak ge•gni elakkao susana miksongenga 

0

 

Tura, December 28, 2022: Re•anggipa December 22 tariko Assam aro Meghalaya Sima Ario donggipa Garojan songona Siminagury songni Ma Serimina Marak-ko dingtangmancha Garojan songni manderangni okamatako man•ne, ua songona re•ange manderangni neng•nikaniko nike Garojan songni manderangna ka•dimiataniko on•baha ine koborna u•iataha.

Serimina Marak-ni u•iattani gitade, Garojan songni pilak A•chikrang Assam aro Meghalaya sima ario donggipa ong•ani gimin, MoU-o soi ka•ani ja•man, Assam Pulisrangni sinjete aro kal•ake roako man•aha. Indake ong•engon, chel•chakgipa dolrang dongjani gimin ua songona darangba re•angna pa•tokjaha. Indake ong•genchimoba, Serimina Marak ua songona re•ange, Garojan songni manderangni neng•nikanina ka•dongani kattarangko aganne ka•dimiataha.

Garojan songosan ong•aigija Malchapara, Salbari jolrangonaba re•ange, aditta jarangna skang Assam pulisrangni pattoko chipatako man•gipa nokdangni manderangkoba gronge uamangnaba ka•dimiataniko on•angaha.

Ua songona re•angani somoio Serimina Marak Skul aro Pulis Out Post, uandake dingtang dingtang songni namroro silroroani bidingo a•dok sorkarina lekka sedoate dabidilgen ine ku•rachakangaha.

Assam aro Meghalaya a•dokni gisepo dongenggipa manderang MoU-ko soi ka•ani ja•man, duk mikchi ong•e, so•sojengjeng ong•ahachim. Uni gimin a•dokni dingtang dingtang NGO-rang soi ka•gimin MoU-ko nipiltaie Sima Ario donggipa manderangni namnika gita dakchina jingjengataniko dake sorkario dabigengoba, da•alona kingkingba manderangni nangnikaniko chu•sokatkuja. Ia so•sojengjeng ong•anirang, a•dokni Skotong Minister Conrad K Sangma-ni chanchiningggija, MoU-o soi ka•ani a•selsa Sima Ario donggipa manderang da•alona duk mikchi ong•an baksa kenchipchipe dongna gita nangenga ineba ua janapataha.

Indake sima ario dongenggipa manderangni neng•nikaniko nike 2023 bilsini Assembly Eleksin-o Serimana Marak, Jirang aro Rambrai ge•gni elakkarango susaebgon, pilak A•chikrang aro sima ario dongenggipa manderangko an•tangna chakpaaniko on•pae 2023 bilsini eleksino chegipa ong•na dakchakpachina A•chik sakantiko mol•molangjolaha.

Serimina Marak jatni kamna ka•oksie gisik nanggipa ong•e, A•chik jatnj kamna kena sin•a gri A•chik jatna kamko ka•na gisik nanggipa ong•a. Uni gimin A•chik jat sakanti re•baenggipa 2023 bilsio an•tangtangni namgnina sima ario donggipa manderang darang candidate-rangni tangka paisachi vote brena joton ka•gipa candidate-ko seokna nangja, Serimina Marak-ko seokna nanga ine aganang didiangaha. Ua da•alo MLA ong•kujaoba, jatna dangdike on•na gisiko nanggipa ong•achim.

Sima ario dongenggipa manderangni neng•nikaniko nike da•alo Serimana Marak 2023 bilsini Eleksin-na tariaha ine parakatengon, badia party-oni susagenchim, uko parakatkuja, indiba ua adita salrangna skang TMC dolo napaha, indiba badia doloni susagen parakatkuja.

Leave A Reply

Your email address will not be published.