Tura, December 28, 2022: Meghalaya Trinamool Congress (TMC), Assam BJP sorkarini kamko jegalataha.
Meghalaya a•dokni Shillong Lower Laichumiere-o donggipa TMC Building Office-o ong•atanggipa Press Conference-o TMC State Vice President George B Lyngdoh aro James Lyngdoh, “BJP dolchi rikenggipa Assam sorkariara maini bidingo aro maio pangchake Assam aro Meghalaya a•doko badita ge gital gilja nokrangko rikaha aro uarangni gimin sing•sandianiko dakenga? Ian manderangni toromo tom•tome janggi tanganina jingjengataniko ra•bana aro ku•sini sal somoio kajia golmalko ra•bana ja•ku de•anisan ong•aia” ine janapataha.
Assam Pulis Special Branch, a•doko badita te gital gilja nokrangko rikaha, badita te gilja nokrang dongsoaha, badita sak manderang bilsi 6-ni gisepo Kristian toromo napaha uarangni bidingo sing•sandianiko dakchina ge•etaha.
Meghalaya TMC Vice President George B Lyngdoh, “Chingni koborrangko man•soani gitade, Intelligence Bureau-ni manderang apsan sing•sandianiko Meghalaya a•dokoba dakenga” ine aganaha.
Assam a•dokni Skotong Minister Himanta Biswa Sarma, pulisrangni kamko mamingkoba u•ija, inaniara manderangko cha•bokanisan ong•aia. Ua 2010 bilsionin North East a•doko manderangni bebe ra•aniko aro toromko jingjengate rona ja•ku de•ani batroroengaha ineba agandapataha.