Tura, Sept 30, 2022: Chang 17-gipa Memorial Service of 30 September, 2005 bilsio dos gri manderang pulisrangni silai goanio guli nange sianggipa A•chik Matgrikrang an•tangtangni janggiko on•kange sianggipa A•chik Matgrikrangko gisik ra•e, kalimaniko dakenba Sukrobar attamo bi•chakaniko dakangaha.
Ia memorial service-ko GSU-CEC baksa TGCSU, PGSU aro AHAM bakrime Tura District Auditorium-o ong•atangaha.
Re•anggipa 2005 bilsio MBOSE-ko bak ka•e Shillong-chi ra•jitangna am•ani bidingo jinma re•jome jegalaniko dakna tom•dakmitting somoio pulisrang silai goanichi sak 9 A•chik Matgrikrang Tura aro Williamnagar-o janggitangko gimaataha.
Ia sak 9 A•chik a•songna janggitangko on•chake, janggitangko gimaatahani gimin uamangna kalimaniko dake uamangni janggina aro tangrikenggipa nokdangni manderangna bi•chakaniko dakangaha.
Indake Tura-ni sakbri A•chik Matgrikrang, je biapon ga•ake janggi galahachim, ua biapo aro uamangni bimingko seenba tarie donenggipa Mangkrong ba Cenotaph sambao mombatirangko so•e, giaik ra•aniko dakangaha.
Ia Memorial Service-ko ong•atanio GSU-CEC-ni Preaident, Tengsak Gabil Momin, A•chik Matgrikrangni gimin agan-talatangaha. Indake Humbirth M.Sangma Satroni kattarangko skiprakangskaha.
Ia salko gisik ra•engon, tom•bagipa manderang sianggipa Matgrikrangna duk ong•aniko mesokna minitsa jrip donge bi•chakangaha. Unbaksana sianggipa Matgrikrangni nokdangni manderangna GSU-CEC aro gipin NGO-rang mande ra•aniko dakangaha.
Apsandake Williamnagar Rongrenggre kal•chakram biapo GSU Eastern Zone aro gipin NGO-rang apsan bakrime puliarangni goako man•ne sianggipa sak 5 A•chik Matgrikrangko gisik ra•e kalimaniko dakangaha.
Ia 30 September, 2005, Andalgipa Sukrobar Salara pangnaba A•chik Ma•ambio gualna man•gijagipa sal ong•a.