September 30 tariko a•sel ong•e sianggipa nokdangni manderang compensation-ko man•a

Williamnagar, Nov 10, 2022: Re•anggipa 2021 bilsio MTC Bus rang•gitik a•sel ong•anio sianggipa nokdangni manderang Motor Accident Claim (MCA)-o pangchake Williamnagar a•jani ning•o donggipa Motor Accident Claim Tribunal (MACT)-o badi ka•aha.

Indake re•anggipa bilsini September 30 tariko Nongchram songo MTC Bus a•sel ong•anio sianggipa nokdangni manderang, victim compensation-ko on•china MACT-o badi ka•ahachim.

Badi ka•aniko man•soe, MTC Department Ukil rim•enba badi ka•gipa manderangna lak 7 tangkarangko on•gen ine ku•rachakaha. Indake badi ka•gipa manderangba Department-ni on•na ku•rachakgipa compensation-ko ra•chake Justice-ni mikkango obostarangko namgrike meligrikangaha.

Ua apsan salon sianggipa nokdangni manderangna ex-gratia lak 1 tangkarangkoba on•angjolaha aro a•sel ong•aoni naljokgiparangnaba hajar 50 tangkarangko on•angjolaha. Indiba MTC Department uamangni ku•rachakgimin gita on•na nangkuenggipa tangkarangko somoi gita on•jaha. Iani a•sel sianggipa nokdangni manderang badi ka•aniko High Court-ona ra•doangaha. High Court-ona sokangani ja•mano, ja gittamni gisepon on•na nangkuenggipa tangkarangko on•na nanggen ine Corporation Department-na raiko on•angaha.

Court-ni ge•etaniko man•soe, Corporation Department uamangni on•na nangkuenggipa lak 7 tangkarangko November jani 7 tariko sianggipa nokdangni manderangna on•aha. Bus gari a•sel ong•anio janggitangko gimaatgiparanga Laskerpara Damra songni Sengsrang R Marak, Williamnagar PWD Old Colony-ni Tangsimbirth M Sangma, Bolkinggre songni Trawin R Marak, Rangmalbadim songni Dimsi M Sangma, Chidekgre songni Larseng M Marak, Balsrigittim songni Chekamchi M Marak-ni nokdangni manderangna lak 7 tangkarangko suale on•aha. Unbaksana a•sel ong•anio rasong gnangbee naljokako man•gipa Nengkra songni Pukan N Marak ban man•a nanggniko man•aha ine koborna parakataha.