Pulisrang dakait dolrang baksa gogrika, rim•srukanggipa sakgni manderangko jokata  

Tura, Nov 10, 2022: Re•anggipa Butbar salo West Garo Hills a•jani pulisrang Bamandanga aro Gaptuli sepango donggipa Dibru Forest Reserve-o silchi dare ra•bitgipa dakait dolrang baksa gogrikani ja•mano, rim•sruke ra•anggipa mande sakgniko jokataha.

Pulis Officer-rangni u•iatani gitade, dakait dakgipa dolrangni bidingo kobor man•ani bakan pulisrang ua dakait dolni manderangko sandiangaha. Indake pulisrangni buringchi re•ange sandiangako dakait dolni manderang niksoe, an•tangtangni ra•bitenggipa silairangchi pulisrangko gosoahani gimin pulisrang dakait dakgipa manderangko gochakskaha.

Pulisrang dakait dakgipa manderang baksa minitgni ba minitgittam mangna gogrikani ja•man, uamangni rim•sruke ra•anggipa sakgni manderangko jokatna man•aha aro dakait dakgipa manderang gogrikao guli nange sigipa sakgnini manggisiko man•aha ine West Garo Hills a•jani SP VS Rathore koborna parakataha.

Pulisrang gogrikgipa biaponiko AK-47 silai ge•sa, 9 mm pistol ge•sa, jakkalkugijagipa rong 32 gulirang aro jakkalgimin rong 33 guli bikrokrangko man•aha ineba u•iataha.