September 30, 2005 bilsio janggitangko on•chakgipa A•chik Matgrikrangko gisik ra•e kalimaniko dakna tarisoa

Williamnagar, Sept 27, 2022: Re•anggipa 2005 bilsini September 30 tariko sak 9 A•chik Matgrikrang jemangan Tura aro Williamnagar-o an•tangtangni gamchatgipa janggiko gimaatahachim, uamangni A•chik jat aro a•songna janggitangko on•chake, janggi galani chang 17-gipa salko gisik ra•e kalimaniko dakna Williamnagar aro Tura-o tarisamsoengaha.

Ia salara kusi ong•e maniani sal ong•ja, indiba duk ong•e kaliman baksa gisik ra•ani aro bi•chakani salsa ong•a. Uni gimin je MLA ba MDC-rang da•o General Eleksin sepangani gimin ia issue-ko minge eleksin-na propaganda ka•e, manifesto dake jakkalengani gimin GSU Eastern Zone raken jegalatenba mikkrakataniko on•ataha.

Ia 30 September, 2005 Andalgipa Sukrobar salara chasongnaba gualna man•gijagipa sal ong•a ine janapatenba saniniba pagipa, depante,adatang, jongipa, nogiparang ia salo dos gri janggitangko gimaataha. Uni gimin a•dokko sason ka•enggipa ba warachakenggipa dolrang gimikan bilsi 16-na jrip donge da•o eleksin sepango ia issue-ko bikotdoe mingknajaode, namgen. “Chingade nidikan chakna man•bajaengjok aro duko ga•akgipa nokdangni manderang suk ong•pagijaniko aganpilengaha” ine GSU parakataha.

“Biming pe•e gando bile saie poster tapako man•na sikode je Minister-ba, MLA-ba, MDC-rang ia 30 September issue-ko minge eleksin kal•kan ka•dongode, chinga GSU East Zone nidame dongjawa, bilaken jingjengatanirangko dakgen” ineba GSU parakataha.