Dama bol 100-ko doke wangalaniko Nov 10-12 tarikona ong•atenga 

0

Tura, Sept 27, 2022: Bilsianti ong•atrongbaenga gita ia bilsioba chang 46-gipa Dama Bol (100)-ko doke Chrokani ba 100 Drums Wangala Festival-ko re•baenggipa November 10-12 tarikona West Garo Hills a•jani Chibragre-o donggipa Wangala A•dam-o ong•atanggen ine koborna u•iataha.

Ia chang 46-gipa Dama Bol 100-ko Doke Wangala-nio bakko ra•na am•enggipa dolrang form-rangko, 100 Drums Wangala Festival Committee-ni Chairman ba Secretary-oniko ra•ena man•gen ine u•iataha.

Re•anggipa bilsirango dakrongbaenga gita Dama Bol 100-ko Doke Wangala-nio A•chik Ma•gitcham Pagitcharang ring•anirang gitrangko ring•susaanirang jekai Harara, Nanggorere Goserong, Do•rimitko Nikoba, Serejing Waljan, Sonatchi Kalsin uandakgipa gitrangko ring•susana man•gen ine parakataha.

A•chik ma•gitcham pagitchamrang bilsigimiko game ge•e man•gipa a•bani mi-misirangko akman tet•mano bilsini bon•angachibara November jao pangnan Patigipa Ra•rongipa (Great Giver) Misi Saljong-ko mittel mitchue, una Chu Rugale, Sasat So•e bilsianti A•chikrang Wangale uko Sagal Amaona watatpilaniko dakronga.

Indake ia Dama bol 100-ko doke Wangalaniko da•alona kingking A•chik jatni dal•batgipa manianiko daksninge ripingenga.

Leave A Reply

Your email address will not be published.