Seperate Electoral Roll-ko tarina motion ra•baako EC-rang budget session-o ra•chakja:Rinaldo

Tura, March 29, 2022: GHADC-ni provisional budget session-ko a•bachengatani skanggipa Monggolbar salo warachakenggipa dolni MDC-rang, Separate Electoral Roll-ko tarie GHADC-o gipin jatrangni bak ra•aniko jegalna Motion-ko ra•baachim, indiba Executive Committee (EC)-rang, iani bidingo chanchirimna motion ra•baaniko ra•chakjaha ine warachakenggipa dolni MDC-rang parakataha.

“Anga bebe ra•a ia District Council-ni sakanti MDC-rang jemangan A•chik a•songko rikna an•chingni District Council-ko tarina re•bagipa gimikan ia Separate Roll-ko tarie gipin jat rorirangni district council-o bak ra•aniko jegalna gita an•tangtangni elakkatangtango A•chik jatna kamko ka•na ku•mitchete re•baaha. Indiba da•o jean Executive Committee (EC)-rang asongenga, CEM Albinush R Marak aro Deputy CEM Nikman Ch Marak-ni dilanio, EC-rang iani gimin chanchianiko ra•baengon raken jegaltaiaha. Ian bilongen dukni katta ong•a. Da•o an•ching ia ja•ku de•aniko dakjaode mikangchi jatna dal•a gimaani ong•gen” ine Rongrong-ni MDC Rinaldo K. Sangma suk ong•gijaniko parakataha.

“Ia miksonganiara A•chik jatni namgnina ong•achim, an•ching dedrang su•drangrangna niksamsoe ja•ku de•ani ong•a. Ia Separate Electoral Roll-ko tarina nangchongmota” ineba Rinaldo Sangma janapatkuaha.