Baghmara, March 29, 2022: South Garo Hills a•jao donggipa Gasuapara Post Office-ko kulia tik ong•jaengani gimin FKJGP Gasuapara Circle jegalataha. FKJGP Gaauapara Circle-ni General Secretary Kalsrang Marak-ni janapatani gitade, basakon post office kulienga, basakon chipenga ma•sipilja, basakobade kulisrangja aro somoi gita kulijani a•sel jolni manderang namen neng•nikaniko man•enga. Nanga lekkarangko post office-o somoi gita man•jaenga aro somoi batangosa man•ronga, indake kam ka•a tik ong•jani gimin jolni manderang bang•en neng•nikaniko chagrongna nangenga ineba u•iataha.
Uni gimin Gasuapara Post Office-ko somoi gita dangdike ba kam ka•e on•aniko jolni manderang nangnikenga aro mikangchi indake kamtangko aratgipa manderangko Gasuapara jolo nangja. Je mandeba kamtangko gisik nange ka•a ua mandeko on•china indine FKJGP Gasuapara Circle dabiangaha.