Prangkybirth April jao ong•atenggipa WAKO India kickboxing-o bakko ra•na tarisoeng

Resubelpara, March 28, 2022: Garo Hills a•jani saksa Kickboxer-o niksengako man•enggipa Te Prangkybirth M Momin, re•baenggipa April 8-oni 17 tarikona ong•atenggipa WAKO India National Kickboxing Training Camp 2022-o bakko ra•na gita an•tangko tarisoenga ine u•iataha.

Bilsi 22 ong•gipa Te Prangkybirth M Momin, North Garo Hills a•jani Resubelpara Daram Tekalang songoni ong•achim. Ua re•baenggipa April 8-oni 17 tarikona ong•atenggipa WAKO India National Training Camp-ona re•ange an•tangna nambate skie ra•na aro mikkangchi nambate National ba International Kickboxing tournament-rango kal•susana ua an•tangko taridapna gita Chennai-chi re•angna gita tarienga ineba u•iataha.

Ia WAKO India National Kick Boxing Training Camp-ona Italy a•songni sakgni International Kickboxing Coach-rang re•bae trainingo skie on•anggen. Ua re•anggipa bilsini August 26-oni 29 tarikona Goa-o ong•atanggipa WAKO India National Seniors & Masters Kickboxing Championship 2021-o bakko ra•eaha aro Himachal Pradesh-o October 1-oni 7 tarikona ong•atanggipa WAKO India National Kickboxing Camp 2021-oba bakko ra•angaha.

Ua mikkangchi maikai Kickboxing tournament-o nambate kal•susana man•gen skie ra•na gita re•angaha. Apsandake da•o ong•atna sienggipa WAKO India National Kickboxing Training Camp 2022-oba an•tangni kalarangko namdapatna miksonge ia kal•susaaniona re•ange bakko ra•na tarienga ineba u•iataha.