SDSEO-ni transfer order-ko ra•galpilchina GSU-ni dabianio AGHPSTA-ba chakpaa

Tura, March 10, 2022:Ru•uta bilsirangna Dadenggre Division-o kam ka•enggipa officer kamoni neng•takako man•na sal 22-san dongenggipa Sub Divisional School Education Officer (SDSEO) Ma B K Marak-ko rang•gitik kam ra•jitangani gimin, GSU WZ, (N) Dadenggre jegalaniko dake, uni transfer order-ko ra•galpilchina dabiengon, All Garo Hills Primary School Teachers’ Association (AGHPSTA), Dadenggre Zone-ba GSU-na chakpaaniko on•ate kakket kam ka•enggipa aro retire ong•na bang•gija salrangsan dongenggipa Officer-ko rang•gitik kam ra•jitanganiko raken jegalataha.
“Chinga Dadenggre SDSEO-ni ning•o skigiparang, sorkarini ong•gija kamna suk ong•ja. Ua officer an•tangni kamo kakket ong•e, chatro chatrirangni namgnina aro Dadenggre Division-ni ning•o donggipa pilak manderangna dangdike on•engachim. Chinga ua officer-ni kosako rang•gitik indakgipa ge•etaniko on•anina jegala, ian saoba officer-ni namgninasa uko transfer ka•aha” ine AGHPSTA janapataha.
Iandakgipa sorkarini kamko association jegalatenba Ma B K Marak-ni transfer order-ko ra•galpilchina aro an•tangni kamko Dadenggre division-o ka•angna on•angkuchina association sorkariko mol•molangaha. Ma B K Marak jensalo kamoni neng•takaha, uni ja•mano education department Dadenggre division-o pangkamgipa SDSEO-ko kamo rakkichina gitaba association dabiangaha.