Tura, March 10, 2022: All Garo Hills SSA School Teachers Association (AGHSSASTA)-ni Publicity Secretary Bunbunbirth R Marak, Rangsakona elekkani MLA Pa Zenith M Sangma, Mawsynram ST elekkani MLA Himalaya Muktan Shangpliang, Umroi elekkani MLA George B. Lyngdoh, Mawlai elekkani MLA Process T. Sawkmie, Rongara-Siju elekkani MLA Pa Rakkam A Sangma, Phulbari elekkani MLA S.G. Estamur Mominin-ko budget session-o SSA skulo skigiparangni neng•nikaniko janapanina AGHSSASTA-ni palo mittelataha.
“Chinga SSA skulo skigiparangni duk mikchi ong•aniko nike chingna chanchie session-o Speaker-ni mikkango chadenge chingna ku•rangko on•anina mittelna sika” ine ua aganaha.
AGHSSASTA-ni President LG. Momin, “Mande ra•ako man•a kragipa an•chingni MLA Pa Rakkam A Sangma aro Pa S. G. Estamur Mominin MDA sorkariko chalaienggipa dolni MLA-rang ong•genchimoba uamang SSA skulo skigiparangni neng•nikaniko nike chingna ku•rangko on•aha. Indiba a•dokni Skotong Minister Conrad Sangma aro Education Minister Lakhmen Rymbui session-o mamingkoba SSA skulo skigiparangni gimin janapjaha.Chingni neng•nikanirangko session-o MLA-rang janape on•genchimoba MDA sorkari maming aganchakaniko man•ja. Uni gimin chinga SSA skigiparangna ja 5-ni dormaharangko chu•gimik on•ja dipetna chinga kamrangko ka•angjawa” ine parakataha.