Williamnagar, Aug 13, 2022:East Garo Hills a•jao donggipa Songsak Te•bil Bonegre songo Public Transport gario Scooty bolsa chagake a•sel ong•aha ine koborko man•aha.
Ia a•sel Sonibar salo ong•aha. Koborni gitade, sak 3 skul chatrorang scooty bilsao re•baenba NH-44E sorok gonggeo Songsak-ina batsotmitting somoio bus gari bolsao chagakeaha. Scooty-o re•baenggipa sak 3 chatrorangoni saksade siaha aro gipin sakgniko bakan Guwahati-chi sanna ra•angaha ine pulirang u•iataha.
Indakgipa a•selrang ong•anichi bang•a chadamberang an•tangtangni gamchatgipa janggiko gimaatenga ine pulisrang suk ong•gijaniko parakataha. Ia a•selni bidingo East Garo Hills a•jani pulisrang mamlako segataha aro a•sel chong•motko ma•sina sing•sandianiko dakenga ineba parakaha.
Iandakgipa a•selrang ong•aoniko naljokatna, “Chinga pilak a•jani ma•gipa pagiparang aro guardian-rangko mol•molatna sika, bilsi chu•onggijagipa an•tangtangni dedrangna maming saloba chakka samgni garirangko salna on•na namgja” ine pulisrang mikkrakatha.