Williamnagar, August 13, 2022:Gitcham bobil dol Garo National Liberation Army (GNLA)-ni donnue donanggimin gopretgipa bosturang aro bang•a slai gulirangko East Garo Hills a•jani pulisrang rakbee kam ka•anichi man•aha ine koborna parakataha.
Pulisrang ia obostani bidingo kobor man•soe ta•raken Durama a•brio donggipa Pillonggre songoniko sandina a•bachengataha.
Indake sandianiko dakenba pulisrang Sonibar pringwalni 1:40 bajimango Pillonggre songoniko bang•a slai gulirangko man•aha. Pulisni chanchichipani gitade, GNLA bobil dolni Commander-in-Chief Sohan D Shira sagi ua slai gulirangko a•ao gope donnuangna nanga.
Pulisrangni neng•bee sandianiko dakanio, Anti Aircraft Ammunition guli rong 79, 7.7 live ammunition rong 175, Electrical Detonator rong 10, 12 bore double barrel ge•sa, 250 gram ong•gipa gelatin-ko Williamnagar Pulis Station-oni km 17 mang chel•gipa Pillonggre buringoniko man•aha ine u•iataha.