Tura, May 3, 2022: A•chik Holistic Awakening Movement (AHAM) Bolori Unit, Sanda chiringko RCC dollong kaa matchotgija galchipe donnani gimin suk ong•gijaniko parakataha.
AHAM Bolori Unit-ni dilgipa E M M Danggo-ni u•iatani gitade, Gambegre C&RD Block-ni ning•o ga•akgipa Somonpara aro Megapgre songoni Meguagre songona wachini somoio bi•sarang skul re•rurana namen neng•nikaniko man•engani gimin songgnini manderang apsan ku•monge da•skari bilsi changsa, 2020 bilsio MGNREGS Scheme project-ko man•e, Sanda chiringko RCC dollong kabatchina on•ahachim.
Song damgnini manderang MGNREGS Scheme-ni tangka gong lak 16-ko man•a ja•manba bilsi gnina kamrangko machotatgija krong dotgniko uan baibai songdoe galchipe donnani gimin AHAM Bolori Unit-na badi ka•ataha. Songni manderangni kobor on•atako man•soe, AHAM Bolori Unit, re•anggipa 2021 bilsio ia dollongko matchote tarichina lekka sedoate didiatahani gimin ia dollong bimang ong•aha. Indiba ia dollongko matchote tarigija galchipe dontaiani gimin AHAM Bolori Unit, suk ong•gijaniko parakatenba, contractor-rangni cha•bokani a•sel songni manderang bang•a neng•nikaniko man•engaha ineba janapangaha. Ia dolongko man•a dipet ta•rake matchotate on•china AHAM dabiangaha, uni gisepon ia dolongko ta•rake taripiljagenchim ong•ode, AHAM raka ja•kuko de•anggen ine parakataha.