Tura, May 2, 2022: A•dokni skotong Minister Conrad Sangma, Common University Entrance Test (CUET)-ni bidingo manderangko jajaatgija jinmana tale aganprakna nanga ine Rongrong elakkani MDC Rinaldo K. Sangma janapataha.
“An•ching a•doko badita ge Non-Centrally Funded/ Private Kolege-rang aro Sorkari Aided Kolege-rang gnang? An•ching a•doko ge 6 Sorkari Kolege, Deficit in Aid-ni ning•o ge 15 Private Kolege-rang, Adhoc Grant in Aid-ni ning•o ge 7 Kolege-rang, Lump sum Grant in Aid-ni ning•o ge 7 Kolege aro Self financed ka•gipa ge 28 Kolege-rang gnang. An•ching a•doko ge 74 Kolege-rang gnang aro ianoni bang•bata Kolege-rangan North Eastern Hill University (NEHU)-o affiliate ka•a. CUET porikkako sena mitam Kolege-rangko donchanggenchim ong•ode, badia University-o ga•akgipa Kolege-rangko donchangna miksonga? CUET-na register ka•ani bon•kamgipa sal May jani 6 tarikon ong•enga. Indake ong•engon, a•dokni Skotong Minister Conrad Sangma, NEHU-oniko CUET porikkako ra•galama ra•galja uko u•iatna nanga” ine Rinaldo Sangma janapataha.