Tura, Feb 12, 2023:Chang 149-gipa Kristian-rangni dal•batgipa ABDK Soba Robibar attamo tom•tome matchotangaha.
Batanggimin bilsirango ABDK Sobako dingtang dingtang Krima-rango ong•atangani ja•mano pangkamgipa ABDK Sobako ong•atna Rongram Block-ni ning•o donggipa Balupara songo biapko man•aha.
Indake ia bilsio skanggipa changna ABDK Sobako Balupara songo ong•atchengaha. Ia biapo ABDK Sobako ong•atna adita bilsirangna Mondolini dilgiparang gisiko nangbe aro rakbee kam ka•anichi ia bilsidipet a•bachengatna man•ahani gimin Mondolini dilgiparang kusi ong•e, Nokgipa Isolko mittelangaha aro ABDK Sobana a•a on•gipa songni Nokmakoba mittele aganangaha.
Ia dal•begipa Kristian-rangni tom•bimongani ABDK Sobako pangkamgipa biap Balupara songo bilsianti ong•atanggen ine parakataha. Ia ABDK Sobako sokachakna chu•onga gita asongchakanirangko tarisona man•jaoba, bebe ra•gipa sakantiko Mondolini dilgiparang mittelangaha. Ia biapko taria matchotkujaoba, mikkangchi bil amadipet taridapanggen ine Mondolini dilgiparang parakataha.
Balupara songo skanggipa changna ABDK Sobako ong•atanio hajalni hajal Kristian bebe ra•giparang bakko ra•angaha aro chel•begipa gipin a•songrangoni Kristian bebe ra•giparang re•bae Isol-ko Olakkiangaha.