NPP President Conrad Sangma elakkatango campaign ka•a bang•a manderang NPP-o napa

0

Tura, Feb 12, 2023: NPP-ni National President aro Skotong Minister Pa Conrad K. Sangma Robibar attamo elakkatangni A•konggre Sepoy Colony gittimni Nepali Mandir-o campaign ka•e NPP-na vote-ko on•china gittimni mol•molangaha.

Ia campaign-o bang•a NPP-na chakgiparang aro kam ka•gipa manderang Conrad Sangma-na chakpaaniko on•angaha.
Conrad Sangma an•tangan South Tura elakkani MLA aro Meghalaya-ni Skotong Minister ong•e, bilsi 5 Meghalaya a•dokko sason ka•anio dingtangmancha Tura-ko namdapataha.

Batanggimin bilsirango Tura maming development-ko man•jachim, indiba jensalo NPP sorkariko rikaha, Tura da•o namen dingtangjok aro Tura-o neng•nikbatgipa ringani chiko ra•bae on•na man•aha, street light-rangko ching•ataha, gittimantio ramarangko tarie on•aha. Indake NPP bilsi 5 sorkariko rike a•doko bang•a dingtanganiko ra•baha ine Conrad Sangma aganaha.

Indake bilsi 3-san MDA sorkari kamko ka•na man•aha, bilsi 2-de Covid-19 o somoi bon•jok. Indiba bilsi 3-ni gisepon bang•a development-rangko ka•aha ine Conrad Sangma aganaha.

Tura-o dal•batgipa PA Sangma Stadium-ko rikaha, Tura Beautification-ko matchote on•aha, Chandmari field-ko nambate tariaha, Tura-o ringani chiko ra•bae on•aha, gittimantio ramarangko tarie on•aha, iandakgipa development-rangko NPP sorkari Tura-na ra•baha ine aganangaha.

Gipin party-ni candidate-rang angni kosako matnange, ong•gija kattarangko aganne songbad-rango matnange seaha, indiba anga darangkoba matnange aganrongja, “Angni da•alo ianona re•banide, na•simangko mol•molna re•baha. Ia electiono NPP chegipa ong•e, Meghalaya a•doko sorkariko riktaina aro bang•a development-rangko ra•bana na•simang baksa ku•mongani ong•a, uni gimin re•baenggipa February 27 tariko ki•tapni noksao sikdepe NPP-na vote-ko on•pachina na•simang sakantiko mol•molna sika. Namgipa leader-ko baseani na•mangni jako ong•a. Hai an•ching apsan ku•monge Tura-ko aro Meghalaya a•dokko namdapatatna nangkuenga” ine Pa Sangma manderangko mol•molangaha.

Pa Conrad Sangma-ni campaign-o sak 100-na baten, dingtang dingtang gittimni manderang kusi ong•bee NPP dolo napeaha. Indake bang•bea manderangni NPP dolna chakaniko nike Pa Sangma namen kusi ong•aniko parakangaha.

Ia program-ko Sepoy Colony Development Committee aro Mahila Samity-ni dilgiparang aro gittimni manderang apsan bakrime ong•ataha aro uamangni gisiko nangbee kamrangko ka•anichi namen chu•sokna gita man•aha.

Leave A Reply

Your email address will not be published.