Tura, Feb 12, 2023:Chang 149-gipa Kristian-rangni dal•batgipa ABDK Soba Robibar attamo tom•tome matchotangaha.
Batanggimin bilsirango ABDK Sobako dingtang dingtang Krima-rango ong•atrongachim, indiba jensalo pangkamgipa ABDK Soba biapko Balupara songo man•ne skanggipa changna permanent ABDK biapo sobako ong•atna man•aha.
Ia biapo ABDK Sobako ong•atna Mondolini dilgiparang aro Isol-ni song nok a•bana dangdike on•giparang rakbee aro gisiko nangbee kam ka•anichi ia bilsidipet a•bachengatna man•aha. Ia rakbegipa kamrangko chu•sokatna man•ahani gimin Mondiliko dilgiparang dingtangmancha Nokgipa Isolko mittele aganangaha, unbaksana ABDK Sobana a•a on•gipa songni Nokmakoba mittelangaha.
Ia dal•begipa Kristian-rangni tom•bimongani ABDK Sobako pangkamgipa biap Balupara songo bilsianti ong•atanggnok ine parakataha. Ia ABDK Sobako sokachakna chu•onga gita asongchakani biapangko tarisona man•jaoba, olakkiaona re•bagipa sakantiko Mondolini dilgiparang mittelangaha. Ia biapko taria matchotkujaoba, ABDK-ni dilgiparang bil amadipet taridapgen ine parakataha.
Balupara songo skanggipa changna ABDK Sobako ong•atanio bang•a hajalni hajal manderang re•batokaha aro chel•begipa gipin a•songrangoni Kristianrang re•bae Isol-ko Olakkiangaha.