Tura, Oct 6, 2022:Bilsianti manirongbaenga gita ia bilsio October 1 tarikoni 5 tarikona ong•atanggipa Hindu-rangni dal•batgipa maniani ‘Durga Puja’, Butbar attamo tom•tome matchotangaha. Garo Hills-ni dingtang dingtang biaprango Hindu-rang puja pandalrangko rike salbongana kingking kusi ong•bee maniangtokaha.
Apsandake Tura songjinmaoba ge 30 puja pandalrangko tarie dingtang dingtang gittimrango maniani bon•kamgipa salo Tura Babupara gittimo donggipa Rongkhon chiringo uamangni tarie manigipa Durga Mite-ko chio galangtokaha.
Ia Durga mite-ko galani somoio bang•bea Hindurang an•tangtangni tarigipa miterangko garirango ra•bae jinma re•jomanio mamingba a•sel ong•jana gita West Garo Hills District Administration chel•chakgipa dolrangko bing•tipe donataha. Uandake DC, Magistrate, SP aro gipin Officer-rang mite galani somoio dongpae bakko ra•angaha. Indaken maming a•sel ong•a gri tom•tome matchotangaha.