Goalpara, Oct 6, 2022: Re•anggipa October 1 tariko ong•ronggijagipa aro kragijagipa a•sel A•chik me•chik saksani kosako ong•aha ine koborko man•aha.
Ia obosta Goalpara a•jani Agia Pulis Station-ni ning•o donggipa Balbala Godarbhori songo ong•aha.
Garo Jatiya Parishad (GJP)-ni President-ni u•iatani gitade, bilsi 16-san ong•enggipa me•chik chadambe class 10-o poraiengachim, ua Pujana chutti ong•ani gimin ripengska baksa nokona re•bamitingo, gipin saksa Mohammad Alom minggipa aro uni ripeng sakgni uamangko ramao dongsoe chadrapaha, ua me•chik bi•sa baksa re•bagipa me•asako dokani ja•mano ua denggu manderang ramaoni miter 300 mang chel•gipa biapona me•chikko rimdrae ra•ange kragija til•ekaha.
Ua me•chik baksa re•angpagipa me•asa uamangoni joke katangenba sepang jolo donggipa songni manderangna koborko on•neaha. Songni manderang bakan ua biapona re•angon, dos dakgipa manderang me•chikko gale katangaha. Ia obosta salni 1:30 bajimango ong•aha, ia obostani bidingo Agia Pulis Station-o Ijahar (FIR) ka•aha aro dos dakgipa manderangko rim•aha ine koborna u•iataha.
“Indake saljrakjrako chingni noa-namchikko kragija kal•ake roaniko chinga Garo Jatiya Parishad raken jegala aro dos dakgipa mandeko niamo pangchake rakgipa sastiko on•na nanga” ine GJP dabiangaha.