Tura, April 29, 2022: Dadenggre elekka-ni AITC Youth Leader ba chadambe dilgipa Rupa Marak til•ekdraako man•ne duko ga•akenggipa nokdangni manderangko grongeaha ine koborna u•iataha.
“Anga Bristibar salo duko ga•akenggipa nokdangni manderangko grongeaha. Uamangni aganna gitade, Tura Pulis Station-ni sak gittam me•chik pulisrang uamangko ka•mikkenataha. Duko ga•akenggipa nokdangni manderang pulisni ka•mikkenatako man•ne duk ong•ani kosako sinjetdapaniko man•aha. Tura PS-ni Pulis me•chik sakgittam duko ga•akenggipa me•chikko dagrange ka•mikkenatenba uko darangba til•ekja ine aganchina ge•etaha” ine Rupa Marak aganaha.
Ia a•sel April 20 tariko, bilsi 20 ong•gipa me•chik saksako kolege matchote nokchi re•angpilmiting somoio me•asa saksa siktatenba drae til•ekdraaha. Uni til•ekdramiting somoio pante saksa mikrontangchi nikaha aro me•chikko jokatna re•angmiting somoio dos dakgipa me•asa katangaha, indiba ua an•tangnj jakkalgipa phone-ko galangaha. Mikrontangchi nikgipa pante til•ekako man•gipa me•chikko noktangchina dilangaha aro nokdangni manderang obosta ong•ani ja•man pulis stationo badi ka•aha ineba u•iataha.
“Indake namgija kamko ka•gipa manderangko rim•e kragipa sastiko on•china sorkari pulisrangko rakkienga, indiba pulisrangan duko ga•akenggipa manderangna chakpilgija dos dakgipa mandenasa chakskaode, ian ra•chakna man•gijagipa kam ong•chongmota. Til•ekako man•gipa me•chik dukni wario sripako man•ne porikkako matchote sena gita man•jaha. Duko gaakenggipa nokdangni manderangni agana gitade, Pulisrang uamangni nokona re•bae sing•sandianiko dakjaha, batesa Pulisrang uamangko pulis Station-ona okamate sing•sandianiko dakaha. Duko ga•akenggipa me•chikko sing•sandimiting somoio Investigation Officer (I/O) ba dongpana nangachim, indiba ua dongjaha aro sing•aniko dakgipa pulis me•chik sakgni duko ga•akenggipa me•chikko batesa dagrange ka•mikkenate kendapataha” ine Rupa Marak u•iataha.
Chinga Pulis Station-o, pulisrangni jakchi dagrangako aro ka•mikkenatako man•ne kenjagokaha aro mikkangchi pulis station-ona re•angna pa•jawaha ine duko ga•akgipa me•chikni pagipa aganaha.
Dos dakgipa me•asako pulisrang rim•aha aro sing•sandianiko dake, niamko gita kraa sastiko man•gen. Unbaksana pulisrang bil dongana duko ga•akgipa nokdangni manderangko kal•steke rona nangja batesa kakketgipa bichalko ra•bana dakchakaniko on•na nanga ineba Rupa Marak agandapataha.