Rugapara Govt LP Skulo me•chik skigipani kamko ra.jitanganina FKJGP jegala

Baghmara, June 2, 2022: South Garo Hills a•jani ning•o ga•akgipa Rugapara Govt LP Skulni me•chik skgipani kamko gipin biapchina ra•jitanganiko FKJGP Gasuapara Circle aro songni manderang jegalataha.

FKJGP Gasuapara Circle-ni General Secretary Kalsrang Marak-ni u•iata gitade, Rugapara Govt. LP Skulni skigipa, Sengme R Marak, Rugapara skulni me•chik skigipani kamko Dimapara skulona ra•jitanganichi Rugapara LP skulni bi.sarangna namen gimaani ong•aha.

Ua an•tangni kamko gipin skulona ra•jitangani giminde maming neng•nikani dongja, uni pal gisiko nanggipa gipin skigipako watatskana man•aigen, indiba ua me.chik kam ba post-koba ra•jitangtengani gimin Rugapara Govt LP Skulo me•chik skigipani kaman dongjawaha, indide maikai uni biapo sakgipin skigipako kamo rakkiangskagen ine FKJGP Gasuapara Circle aro Rugapara songni manderang sing•doangaha.

Unbaksana, kobor man•soani gitade, Dimapara skulo skigipa sakgnisan donga aro ua skulo skigipa chu•onga. Indide Sengme Marak badia biapona kamtangko ra•angskaenga ineba FKJGP sing•doangaha.

Uni gimin ia a•selni bidingo ta•rake  department-ni authority-rang sing•sandianiko dakenba kamko ka•angpachina FKJGP Gasuapara Circle mol•molataha.
Sengme Marak antio salsasan skulona re•baronga, indake kamtangna gisiko nanggijagipa skigipako kam ra•jitangnan nanga, indiba post-kode ra•jitangna  man•jawa. Uni biapo gisiko nanggipa gipin skigipako watatskana nanga ineba FKJGP Gasuapara Circle dabiangaha.