Tura, June 1, 2022: Meghalaya Environment Week-ko maniani bak gita, Meghalaya Forests and Environment-ni Minister, James Pangsang K Sangma, June 1 tarik Budbar salo “Seed-Ball-ni chin ba Initiative and GIS Based Natural Resources Management Boundary Mapping”-ko Tura sepango donggipa Harding Theological Kolege, Edenbari-o a•bachengate on•angaha.
Iako a•bachengate on•ani salo GHADC-ni CEM, Albinush R.Marak, West Garo Hills Deputy Commissioner, Swapnil Tembe, Forest-ni Chief Conservator PR Marak, MBMA aro MBDA-ni Official-rang, bang•a gipin department-rang, chatro chatrirang, bang•a skulni skigiparang aro gipinrang dongpae bakko ra•angaha.
Iako a•bachengatani salo James Sangma jinmana aganprakengon, environment-ni bidingo mikkrakatani program-rangko ong•ate, environment week-ko manianio pilak skulrang, kolege-rang, university-rang, songni manderang, government department-rang, dilgiparang aro gipinrang bakko ra•na nanga ine aganangaha.
Meghalaya Environment Week, 2022-ko maniani chin gita Meghalaya sorkari seed ball-ko a•dok gimikon a•bachengate, a•dokni dingtang dingtang skulrangni chatro chatrirang baksana pilak ge-46 C&RD Block-rango program-rangko ong•atchina didiangaha.
Indake global warmingni gimin aganengon, da•alni program-o a•dokko tangsekgilgil ong•atna dakchakani gita cha cha ong•gen ine tom•bagipa manderangko ong•telaigipa environment-ko simsake rakkichina James Sangma didiangaha.
Uni namgipa kamko a•bachengate manderangna mikkrakatani kattarangko aganne didianganina, GHADC-ni CEM Albinush R. Marak kusi ong•ani aro mittelani kattarangko agananga baksana Garo Hills-ko tangsekgilgil ong•atna manderangko didiangdapaha.
Ia programo Centre-ni Excellence Director Dr. Subhas Asutosh, jinmana aganangengon, seed ball-ko a•bachengatani gimin talate a•doko buring bolgrimrangko name ripingchina aro ku•monge a•jako tangsimbitbit ong•atchina manderangko didiangskaha.
Ia Programo Tura Public Skulni Anchita Roy aro Casarina Public Skulni Ebriana Naomi Marak dongpae jinmana agan ku•pattidapangaha. Indake ia program-ko a•bachengate on•ani somoio mongsonggipa sokgipa, dingtang skulrangna aro dongpagiparangna seed ball-ni packet-rangko suale on•angjolaha.