Tura, November 22, 2022: Republican Party of India (RPI) Athawale Garo Hills Region, Monggolbar salo tanggitik tom•aniko ong•ate chanchirimaniko dakangaha.
“Chinga Assam pulisrangni ka•saninggijagipa kamko raken jegala. Assam pulisrang sima ario dongenggipa West Jaintia a•jani Mukroh songo dos grigipa ramram manderangko an•chi pari nike ka•saninggija goe galaha. Mukroh songni manderang jemangan ia a•sel ong•anio janggitangko gimaatahachim, uamangni duko chinga RPI Garo Hills Region, uamang baksa bakrimpaa. Ia ka•saninggijagipa kamo jak donggipa Assam pulisrangko sasti on•na nanga” ine RPI Garo Hills Region-ni Spokesperson Novembirth Ch. Marak parakataha.
Ia obosta MDA sorkariko re•dilenggipa Conrad Sangma-ni a•sel ong•a. Uni MoU-ko soi ka•miting somoio ua songni manderang baksa ku•mong nangrime kamko ka•genchimode, indakgipa obosta ong•jawachim. Uni gimin mikkangchi indakgipa a•selrang ong•taijachina MDA sorkari sima ari jolrango iandakgipa a•selrangoniko naljokatna chu•onga gita chel•chakgipa pulis dolrangko donna nanga ine RPI dabiangaha.
“Una agreba, chinga RPI Garo Hills Region, pulisrangni goako man•ne sianggipa nokdangni manderangna tangka gong kror 1 aro saknaako man•gipa manderangna gong lak 50-ko sorkari on•na nangchongmota ine RPI Garo Hills Region dabiangaha.