Shillong, November 22, 2022:Meghalaya Sorkari a•doko namroro silroroaniko ra•bana krenge kamrangko ka•engon, Sombar salo Skotong Minister Pa Conrad K Sangma, West Jaintia Hills a•jani Namdong C&RD Block-ko oprake on•angaha aro namgipa baikamgipa janggi tangani cholrangko on•na gita songni manderangna jilla-kaanirangko sualangaha.
Namdong C&RD Block-ko oprake on•ani salo Skotong Minister jinmana aganprakengon, “Ia Namdong block-ko oprake on•na ru•uta salrangoni chu•sokatgijagipa kamko da•alo chu•sokatna man•ahani gimin, anga namen kusi ong•a. Ia gital block-ni ning•o songdonggiparangna bang•bata bilrangko on•na man•na gita miksongani ong•a. Ia gital block-ko tarina sorkarini nangchongmotgipa kam ong•a, maina ian songdonggipa manderangni ru•ute songree bon•atgipa somoirangko galaoni jokatna gita man•gen aro namroro-silroroani kamrangko ka•anio ta•rakbatatna man•gen. Manderangna nama sasonko sepangbatao ra•bana chinga dongdipgija kamko ka•e, chinga West Jaintia Hills a•jani Namdong C&RD Block-ko oprake on•na man•aha. Ia gital C&RD Block-an scheme-rangko songrangni namgnina chu•gimik jakkale namroro-silroroaniko ra•bana gita kam ka•gen” ine Pa Sangma aganangaha.
Iana agreba, Rural Backyard Piggery Scheme, PROGRESS-ni ning•o, mang 388 wak bi•sarangko (sakprakna bima mang-3 aro bipa mang-1)-ko West Jaintia Hills a•jani sak 97 game cha•gipa nokdangrangna suale on•angaha. Ia ‘PROGRESS’ scheme-ara dingtang dingtang jilla-kaanirangko on•ne namgipa aro baikamgipa janggi tangani cholrangko game cha•giparangna on•na miksongani ong•a. Ia scheme sak 10,000 kangal cholgrigipa game cha•giparangna namgnirangko on•na aro a•doko wak aro do•o be•enrangko bang•bate man•na ka•donganio ia scheme-ko ra•gataha. Una agreba, Kuroiler do•o bitchi chi•na rakgipa ba high yielding variety-koba sak-41 manderangna suale on•angjolaha.