Rori saksani A•chik mahariko ra•e affidavit ka•aniko ra•chakna man•jawa: Rinaldo

0

Resubelpara, May 30, 2022: Bang•a songbadrango aro Social Mediarango niksona man•enggipa kobor, jean gipin jat saksa an•tangni biming, jat, chatchi aro toromko A•chik jat ine an•tangko gital dake affidavit ka•ahachim, uan kraani ong•ja aro ra•chakna man•chongmotjawa ine Rongrong elekka-ni MDC Rinaldo K. Sangma parakataha.

“Rori saksa Islam Goni an•tangni bimng, jat, chatchi aro toromko A•chik jat ine an•tangko affidavit ka•aha. Ua Meghalaya a•doko Tribal jat ine channako man•ne, tribal manderangni sorkarioniko man•enggipa Reservation-rangko man•pana sike, indakgipa ja•kuko de•aha. India a•songni Apex Court-ni dongimin aro ra•gatgimin niamni gitade Schedule Caste-o atchie biming segatako man•aha, indiba uamang pilakan an•tangni caste-ko galna man•jawa, ine sea gnang. Indide schedule caste-o atchikapgipa aro biming segatako man•gipa Islam Goni-ara maikai an•tangko Osman Goni Marak ine Affidavit ka•aha. Ian niamni kosako ong•a. An•ching A•chik jatrang skang chengoni dakbewal rikbewalko ja•rikronga aro da•ona kingkingba ja•rikengkua. Uandake Marak maharini ning•o donggipa bang•a chatchi maharirang Islam Goni-ko Marak mahari de•na am•aniko jegalna nanga. Rorirang A•chik jatni gam jinna mikboke an•tangko A•chik ine chandrana am•aniko pilakan rake jegalchongmotna nanga” ineba didiangha.

Garo Hills a•jani pilak District Administration-ni Officer-rang, Garo Hills Autonomous District Council (GHADC)-ni ka•rimskarang, Garo Hills Bar Association-ni manderang, indakgipa manderangni affidavit ka•na ra•anggipa lekkarangko rongtale check ka•e ra•chaksona nangja. An•chingni A•chik a•songo indakgipa namgija miksongani gnang, A•chik pil•na am•gipa manderangoni naljokna gita GHADC Garo Customary Law (GCL)-ko ra•gatna nangchongmotgen. Uandake batanggimin Budget Session-o chingni dabianirangko knachake Seperate Elektoral Roll-koba ra•gana nangachongmota ineba Rinaldo Sangma didiataha.

Leave A Reply

Your email address will not be published.