GHADC-ni budget session-o tangka gong kror 137-ni provisional budget-ko pass ka•anga

0

Tura, March 31, 2022: GHADC-ni salgnina ong•atanggipa budget session-ni bon•kamgipa salo April 1 tarikoni July 31 tarikona chamgimin tangka gong 137, 83, 22, 613-ni provisional budget session-ko pass ka•angaha.
Ia Budget session-o GHADC-ni dingtang dingtang department-rangna tangka chamgiminrangni gisepo Civil Works department-na bang•bate gong 61, 93, 79, 061-ko chamangaha.

Unbaksana GHADC-ni gipin department-rangna tangka chamanio Land & Revenue-na gong 5, 09, 52, 843, Forest-na gong 7, 04, 93, 739, Justice Administration-na gong 1, 27, 32, 123, General Administration-na gong 6, 03, 06, 020, Rural Development-na 3, 88, 85,758-ko, Council Transport-na gong 1, 28, 65, 400, Rural Administration-na 1,68,18,750, Council Printing & Stationary-na gong 2,24,95,770-ko, Legislative-na gong 1,84,32,850, Taxation-na gong 2,69,69,373, Water Works-na gong 1,84,48,852 aro Tourism-na gong 9,84,28,800-ko chamangaha.
Komibate tangka paisa chamako man•gipa department-ranga Agriculture-na gong 79,31,075, Relief Works-na gong 63,46,848, Finance-na gong 62,70,585 aro Market-na gong 25,64,760-ko chamangskaha.
Indake ia budget session-ni bon•kamgipa salo GHADC-ni Deputy CEM Nikman Ch.Marak Codification of Garo Customary Law (GCL)-ni gimin motion-ko ra•bae, GCL-ko taridapani bidingo apsan chanchirimangaha. GCL-ko taridapanio pilak chatchi maharirang, Nokma-Sordar-rang, A•chik a•songo songdongenggipa manderang aro ma•giparang baksa apsan ku•monge galna nanggipako gale, ra•dapna nanggipako ra•dape apsan sko dondime nipilaniko dakna tik ka•anga.

Ia motion-ko ra•baani gimin warachakenggipa dolni MDC-rang kusi ong•bee, chakpaaniko on•anga baksana ia GCL-ko taridapanio mikkangchi maming neng•nikaniko man•jana gita agre skelgija somoiko ra•e tarichina sason ka•enggipa EC-ko didiangaha.
Ia tarigimin GCL-ko namedake nipiltaianiko dakna gita ge•sa committe-ko songe che•em che•em nipiltaiani ja•manosa Governor-ona watdoatchina warachakenggipa dolni MDC-rang didiangkuaha.

Budget Session-ni bon•kamgipa ba gnigipa salo Tura MDC Bernard N.Marak-ni ra•bagipa mingbonga motion-rangoni mingsa 15-gipa finance commission-ni gita rural local bodies-ko songe, songadam nokadamrangko aro Nokma Sordar-rangko bil gnangatna aro namroro silroroanirangko ra•bana miksonganio ra•bagipa motion-ko house-o ra•chakangjolaha.

Leave A Reply

Your email address will not be published.